O pedrón de Padrón, comezo da tradición xacobea, estudado polo Padre Sarmiento

01/07/2021 | actividades
2021_03_01

Esta lámina, realizada en tinta sobre papel, pertence ao Caderno de debuxos atribuído ao Padre Sarmiento que se conserva no fondo documental do Museo Arqueolóxico e foi recentemente publicada na Peza do Mes. O investigador Justo Carnicero Méndez-Aguirre estuda o conxunto de inscricións e debuxos de diversos elementos artísticos e arquitectónicos que coinciden exactamente cos lugares por onde pasou o P. Sarmiento, nas súas tres viaxes a Galicia en 1725, 1745 e 1754-1755.

O caderno, composto por 76 láminas de formato apaisado (28 x 38 cm), encadernado en rústica e con lombo de pel, foi adquirido pola Comisión de Monumentos a comezos do século XX. A importancia deste traballo radica en que o P. Sarmiento, inmortalizou as pezas, «in situ», nos lugares onde se encontraban no século XVIII. Son pois, «fotografías» das súas viaxes.

A lámina que presentamos inclúe o debuxo do pedrón de Padrón, e textos que recollen a lenda xacobea que o rodea.

A pedra, labrada en granito era, en orixe, unha ara romana empregada como altar nas cerimonias dedicadas ao deus Neptuno. Na súa superficie pode lerse unha inscrición que os expertos traducen como “a Neptuno coas achegas dos irienses”, o que confirma a advocación ao deus romano das augas.

Posteriormente o pedrón foi “cristianizado” coa adición dunha cruz gravada. A tradición xacobea lígao coa traslatio, a chegada por mar do corpo de Santiago o Maior, afirmando que ésta foi a pedra na que a barca apostólica se amarrou cando tocou terra. Segundo a lenda, Atanasio e Teodoro, discípulos do Apóstolo, trouxeron os seus restos por mar dende Palestina a Galicia cruzando o Mediterráneo, atravesando as columnas de Hércules (o estreito de Xibraltar) e bordeando a costa atlántica. A traslatio marítima remataría en Padrón, coa chegada da barca ao porto de Iria Flavia. Alí sería amarrada a nave ao pedrón e desembarcado o corpo camiño do outeiro de Libredón, na actual Compostela, onde acabaría sendo enterrado e redescuberto oito séculos despois polo eremita Paio. Este feito provocaría o traslado do bispado de Iria Flavia a Santiago.

O pedrón atópase hoxe baixo o altar maior da igrexa de Santiago, no casco antigo de Padrón.

#DIM2021 Obradoiro didáctico “O meu, o teu, o noso Museo”

22/06/2021 | actividades
dim2018

Todos os proxectos elaborados foron magníficos!

Tras moitas deliberacións o CEIP Virxe da Pena da Sela (O Irixo) e o CEIP de Oímbra foron os colexios elixidos para desfrutar dun Obradoiro Arqueolóxico agasallo de Xeitura para o vindeiro curso escolar.

Todos os colexios participantes recibirán un lote de libros para as súas bibliotecas.

Temos que agradecer a dedicación e calidade didáctica da responsable destes obradoiros, Begoña Garrido Labrador de Xeitura.

Noraboa a todos os alumn@s e profesores porque sodes uns grandes museólogos!

Proxecto do CEIP Virxe da Pena da Sela (O Irixo)

Pescudando no noso pasado

Proxecto  do CEIP de Oímbra

Villae Olimbria

Vaso votivo. Castro de Castromao

01/06/2021 | 2021 | peza do mes
Vaso votivo. Castro de Castromao

O vaso que presentamos foi recuperado no xacemento de Castromao, na campaña de escavación de 2007, dirixida por L. Orero Grandal.

Trátase da parte superior dunha xerra ou vaso de 10’5 cm de diámetro aproximadamente cunha característica decoración. Consérvanse dúas asas da peza, aínda que se ten dito que podería ter unha terceira, agora perdida. Enriba das asas, obsérvanse cuncas hemisféricas. Na parte superior do corpo aparece un cordón plano, xunto con catro motivos realizados a molde e aplicados ao vaso. Dun lado, pódense observar a cabeza dun león e un acio de uvas e do outro, unha cesta que parece conter froitos e outro acio de uvas, aínda que cunha configuración algo diferente ao anterior.

Sobre a súa produción, as características da pasta apuntarían a unha cerámica común fina producida en Bracara Augusta.

Polo contexto de aparición da peza, podemos datala a finais do século I ou inicio do século II.

#DIM 2021: Vídeo «Museo Arqueolóxico. Pasado, presente e futuro»

20/05/2021 | actividades | destacado

Con motivo do Día Internacional dos Museos elabórase este vídeo sobre a historia do edificio do Museo na Praza Maior, que se presenta e exhibe dende o 13 de maio ao 13 de xuño na Biblioteca Pública Nós en Ourense.

#DIM 2021: Streaming para ver a Quico Cadaval en directo

18/05/2021 | actividades
dim2018

#DIM2021 : O FUTURO DOS MUSEOS: RECUPERAR E REIMAXINAR

 

Quico Cadaval“A memoria reimaxinada”

18 de mayo ás 20:30 h.

Emisión en streaming vía Facebook Live

Enlace: https://www.facebook.com/events/500532077768263/

← entradas máis antigas