Cerámica bracarense. Campamento Aquae Querquennae

02/03/2022 | 2022 | peza do mes
2022_03_p

A peza que hoxe presentamos, un prato de cerámica bracarense, rexistrouse no museo co número DX1209/26. A restauradora Iria Veloso foi a encargada da súa limpeza e reintegración, como nos explica no documento anexo.

A cerámica bracarense é unha cerámica fina de  carácter rexional que se caracteriza por unha pasta  clara, de cor crema ou castaño suave, moi decantada  e depurada, que se cobre, ás veces, no exterior, dun  engobe alaranxado, aínda que pode aparecer sen el.

A presenza significativa deste tipo de vaixela de mesa  en Aquae Querquennae, debe estar relacionada coa  subministración á lexión situada neste campamento.

Vídeo “Creación dun gravado a punta seca”, pertencente á exposición “Símbolos xacobeos e imaxes de Santiago. Impresos do barroco compostelán”

Con motivo da exposición “Símbolos xacobeos e imaxes de Santiago. Impresos do barroco compostelán” elabórase este vídeo sobre a creación e estampaxe dun gravado a punta seca co artista plástico Roberto González Fernández.

Símbolos xacobeos e imaxes de Santiago. Impresos do barroco compostelán

simbolos_xacobeos

Brazalete. Castro de San Cibrao de Las

02/02/2022 | 2022 | peza do mes
Brazalete do Castro de San Cibrao de Las

Nas últimas escavacións arqueolóxicas levadas a cabo no Castro de San Cibrao de Las sucedéronse un bo número de achados de obxectos de adorno persoal realizados en bronce, entre os que destaca este brazalete, a cuxo estudo queremos achegarnos co propósito de animar os novos investigadores a facer un estudo en profundidade.

A peza en cuestión é un brazalete de bronce, elíptico e de sección triangular, fundido en cera perdida, de dimensións pequenas: eixe maior 5,8; eixe menor 4,26; anchura 0,9 e un peso de 23 g. Está formado por unha fina moldura a xeito de crista, coidadosamente decorada con dezanove círculos concéntricos a ambos os dous lados, e con vinte e cinco perforacións circulares, perfectamente realizadas, na pequena pestana que sobresae. Os extremos están rematados mediante varias acanaladuras e sendas cabezas zoomórficas, probablemente, parrulos. O seu estado de conservación é magnífico; presenta unha pátina intensa, continua, cubrinte e case uniforme de cor verde malaquita.

As súas pequenas dimensións fannos pensar que só puido lucilo un neno ou unha nena, a quen se lle debeu colocar como adorno e amuleto cando era moi pequeno, quizais para que o levase toda a vida.

Albarelo da farmacia do colexio Santiago Apóstolo S. I. de Monterrei (Ourense)

05/01/2022 | 2022 | peza do mes
Albarelo da farmacia do colexio Ap—stolo S. I. de Monterrei. Our

Un dos logros que a Compañía de Xesús achegou ao mundo foi dotalo dunha rede de farmacias, que se orixina nos séculos XVI – XVIII, e conxuga a «medicina verde» (raíces, follas, resinas) coa teórica de libros de autores clásicos, coma Dióscorides e Galeno.

Esta peza do Museo é única por varias razóns: primeiramente, porque é a única conservada da botica de Monterrei; en segundo lugar, non se conserva outra en Galicia; e terceira razón, porque forma parte dunha iconografía propia, que teñen outras farmacias do resto de España, co escudo da Compañía de Xesús.

Este albarelo chegou ao Museo Arqueolóxico en xaneiro de 1905. A cerámica é de tipo Talavera, con escudos en azul cobalto que destacan sobre o branco estannífero. Ten de alto 28 cm e de boca 10 cm de diámetro e no seu campo está o escudo co anagrama da Compañía de Xesús con inscrición (IHS), cruz e tres cravos.

 

← entradas máis antigas entradas máis recentes →